Leve Leserin, leve Leser,
„Teken is de Spraak för de Ogen – Spraak is Maleree för dat Ohr“. Dat hett de Moralist Joseph Joubert (Frankriek 1754-1824) mal seggt. Platt kann Biller „malen“ un Koppkino bi uns utlösen. Platt kann maken, dat Minschen wat föhlt – in all Richten….! Platt kann ünnerholen, Langwiel verdrieven un noch veel mehr. Plattdüütsch leevt un wiest sik mit veel Klöör! Dor kunn een doch denken: „Mehr geiht nich!“ Doch! Dor geiht noch veel mehr! Wenn de Spraak op bunte Stifte, Papeer oder Tekenprogramme drapen deit, denn warrt dat Koppkino noch lebenniger un maakt noch mehr mit uns. In dit Heft kaamt Spraak un Bild sik so dicht in de Mööt as dat dichter kuum geiht un warrt op moderne Wies to Kunst.
De Maler Pablo Picasso (Spanien 1881-1973) hett seggt: „Kunst is dorto dor, dat se uns den Stoff vun den Alldag vun de Seel waschen deit.“ Un just dorför is dit Heft entstahn: för Minschen, de sik drapen un snacken, praten oder kören, sik ünnerholen un uttuschen willt un nich so recht weet wo se noch so över snatern köönt. Dit Heft is för Plattdüütsche in Volkshoochscholen, Beroopscholen, Plattkrinks, Unikurse un all de anneren Minschen, de sik op Platt uttuschen un den Stoff vun den Alldag för en lütten Tiet afwaschen willt. Pablo Picasso hett ok seggt: „Wenn dat blots een eenzigen Wohrheit geven wörr, denn kunnen nicht hunnert Biller över datsülvige Thema maalt warrn.“ Ok hier is dit Heft en good Biepseel. Snack blots över den Text un du warrst sehn, dat in dien Kopp heel annere Biller hoochkaamt. Annersüm – kiek blots de Biller an un du kümmst op annere Frogen. Wat op jeedeen Fall dorbi rutkamen deit, is en „Snack op Platt“.
De Komiker Karl Valentin (Düütschland 1882-1948 ) hett mal seggt: „Kunst is schöön, maakt aver veel Arbeit.“ All, de an dit Wark mit togangen weren, weet blots to goot, wat Karl Valentin hier meent hett. Dat dit Heft tostannen kamen kunn, hebbt wi en Reeg vun junge Künstlers to verdanken, de nich bang weren, sik mit Plattdüütsch uteneen to setten. Enige harrn den eersten Kuntakt to Platt. Wi vun dat Lännerzentrum för Nedderdüütsch in Bremen dankt de jungen Lüüd vun Harten för disse flietige Arbeit!
För di, leve Leserin un leve Leser, sünd Spraak un Kunst vereent to en Vörlaag för dien Fantasie worden. Maak wat dorvun!
Nu büst du an de Reeg!
3D Book
Galerie
Download – Dateien
Dat Heft dörf för den egen Bruuk oder in Krinks, Volkshoochscholen, usw. geern dallaat un utdruckt warrn. Dorbi is bidde as Quell dat Lännerzentrum för Nedderdüütsch to nennen. Wenn Dele dorvun veröffentlicht warrn schüllt, stellt Se bidde en Anfroog an uns. Danke!
Gern darf das Heft für den eigenen Gebrauch oder den Einsatz in Gesprächskreisen, Plattkursen, etc. heruntergeladen werden. Wir bitten, das Länderzentrum für Niederdeutsch als Quelle zu nennen. Vervielfältigung und Abdruck über den eigenen Gebrauch hinaus ist mit dem Länderzentrum abzustimmen. Danke für das Verständnis!